L ea dotor de familia, dei dentes, de ra femenes ►AUDIO

Ascolta questo articolo in podcast su Spotify.
Gli altri articoli di “Ladino e dintorni”

Un ricordo, a 93 anni dall’immatura scomparsa, di Angelo Majoni, medico e studioso della storia e della parlata ampezzana.

Ai 15 de dezenbre del 1932, morìa de un colpo Anjelo Majoni dei Bote, dotor e scritor. Nasciù inze a Majon el dì de ra Madona de agosto del 1870, dapò de aé stà a scora in Anpezo, i suoi – con gran struscies – i l aea vorù bete al Jinasio inze a Parsenon.

Dapò de ra matura, el s aea notà a r Università a Inspruch, e de vintessié ane l é deentà dotor. L à lourà nafré inze chera zità e dapò, par pi de 30 ane, l é stà dotor de familia, dei dentes, de ra femenes inze el sò paes.

Ci che l aea conosciù fora a Inspruch i dijea che l ea un dei dotore pi varentes del Tirol e che l sarae ‘sù de seguro inaante se l aesse vorù sin ‘sì da Anpezo. Majoni inveze l à vorù lourà pa ra sò ‘sente e fin del ‘30 l é stà diretor del ospedal de Comun, ra ciasa agnoche dapò par anes i à betù i lessie.

Anche mè pare l se pensaa del dotor, senpre serio, ma sote sote un bonazo, che del ‘29 el i aea tirà un dente e par el consolà l i aea finamai donà na moneda! Anjelo dei Bote l é stà un dei prime in Anpezo a se montà coi schie, pi par laoro ca par ‘sì a spasso; l é stà un dei prime a ‘suià al golf, consilier del Turnverein, del Museo del Codèsc e dei Ponpiere.

Coi maestre Bruno Nert e Bepe da Rone l à betù ‘sò na bona «guida turistica» de ra val, vienuda fora del 1905; l à studià con gran cognizion ra storia, i gnomes dei luoghe e ra parlada anpezana e l à abù l merito de vardà fora par prin ra pi vecia cartes de ra Regoles. Ancuoi là da ra Regoles l é l inventario de ra cartes che l à strutà su: scrite de ra Regola Basses, libre, copies de ate.

Del ‘29 l é ‘sù adora a stanpà l prin vocabolario anpezan, e sul scomenzà del inverno ‘32-’33 i à zedù l cuore, de 62 ane; sun ra sò toura l à lascià i ultime scrite, dute intressantes pa ra storia e ra cultura anpezana. El Comun l à vorù alolo el recordà: l à ‘sontà el sò gnon a chi dei benemerite inze porteà, l i à dedicà na strada via in Crignes, e dal 2000 anche ra Ciasa de Poussa ra porta el gnon de chel gran anpezan.
Nesto Coleto

L’articolo è pubblicato nell’edizione cartacea dell’Amico del Popolo n. 51 del 25 dicembre 2025, in distribuzione questa settimana (su abbonamento, in edizione digitale e in edicola)