Ascolta questo articolo in podcast su Spotify.
Gli altri articoli di “Ladino e dintorni”
Il 4 dicembre ricorre il centenario della nascita di Lino Lacedelli «de Mente», l’«uomo del K2» e uno degli indiscussi portabandiera dell’alpinismo ampezzano.
‘Soiba ai 4 de dezenbre Lino Lacedelli «de Mente» l conpirae zento ane. Lino l é stà tropo conosciù, da ci che và in croda, ma anche da ci che l no và, parceche ai 31 de luio del 1954 l é stà el prin a bete i pès con Achille Compagnoni da Cervinia su in son del K2, ra seconda zima pi outa de ra tèra.
«Schirata» dal ‘47 e guida dal ‘50, l é stà un dei taliane pi fortes su pa ra crodes inze i anes ’40-’50, e ci che sà i conosce ra via leada al sò gnon, chera sul paré Sud Ovest de ra Zima Scotoni in Fanes, che l aea daerto con Bibi «Broco» e Guido «dai Pale» dai 10 ai 12 de ‘sugno del ‘52, dapò trentaoto ores de struscies e con zento e cuaranta ciode inpiantade inze l paré.
Lino l ea fouro, ma canche l é tornà dal K2, con sò fardel Leo l à betù su na botega de sport, che l é stà una de ra pi conosciudes d Italia e r é stada portada inaante par anes da sò neodo Mario, anche el «Schirata» e guida. A ra fin de luio del 2004, fin che alcuante ‘soen (Marco Da Pozzo bonanima, Mario «Moro», Mario «de Mente», Renato «Peliza» e Luciano «Laresc») i ficiaa ‘sò danoo l stendardo de ra Schirates su ra zima jazada del K2, Lino l ea là pede lore.
L aea caminà par 138 chilometre fin su al Campo Base, e da là el no ra fenia pi de vardà su, anche con calche lagrema, l «sò» K2, ra zima agnoche l aea passà una de ra ‘sornada pi beles de duta ra sò vita.
L é ormai sedesc ane che Lino l é morto; del 2004, da na ciacolada col scritor Giovanni Cenacchi, l ea vienù fora un libro agnoche, dapò de tante anes, l aea vorù dì ra sò verità sul K2, chera verità che Bonatti l aea cusà el, Compagnoni e Desio de aé senpre contà cemodo che i comodaa a lore. Coi anes duto s à chietà via: par dute Lino l é restà «Lino del K2», e deboto fin dinultima, el i à contà a ci che vorea ra saé, ra storia del K2 e de chel dì de luio del 1954 canche, intor res sié da dasera, l é ruà su zenza pi fiado a 8611 metre, su ra seconda zima pi outa del mondo.
Nesto Coleto
