Ascolta questo articolo in podcast su Spotify.
Gli altri articoli di “Ladino e dintorni”
Considerazioni rassegnate su alcuni rifugi montani delle Dolomiti, mano a mano trasformati in ristoranti d’alta quota, après-ski dove scorrono vini pregiati e dove a musica rompe l’incanto della montagna.
Ra voia de ra Olinpiades, ra chiza del lusso r à ormai tocià duta ra nostra val, e tropo de chel che l ea l é stà reoltà su: el pi de ra otes l é stà ben coscita, asàche somea che aaron strada noes e pi comodes, piazai pa ra machines assei par el resiro che l é, un ospedal comedà fora dapò un grun de anes, un Nodo noo, el Souto che l no sin ‘siarà in fasc e tanta outra robes.
Ma algo l é stà anche desfato e no l aaron mai pi sote i oce.
Lascion via ra ciases, ra viles e i hotiei, agnoche nosoutre no beton el pè: sto colpo parlon dei refuje. Dei refuje su par outo agnoche saon usade a passà anche solo par un cafè, na bira, doa ciacoles, canche se ‘sia a caminà.
Anche de alcuante de chi no n é pi nuia: chel del Lago de Aial, agnoche no n ea el telefono e gnanche ra machina del cafè ma l ea aria de ciasa, l é deentà un restorant de lusso e gran ciaro: chel su al Lago de Pianozes istesso, l é deentà un sito par magnà pesc, o meo «il pescato del giorno», portà su dal mar mangare col elicotero; chel su in Faloria, fato su del 1939 e dedicà a ra fia de Mussolini, ades l à gnon «SuperG – Faloria Mountain Club» e l é deentà l «après-ski più esclusivo delle Dolomiti, con DJ set party per vivere la montagna a ritmo di musica». E ci che và lassù a caminà e l à gora de un semel e de na bira, desseguro el no sarà invoià a se fermà inze anbientes ciare, pies de bordel, de gasèr e de lumes.
Cissà se outre refuje su par outo – in Badia, Fascia e Gardena in é pi de un – i no deentarà pian pian anche lore site che proferisce pesc e champagne, agnoche ra crodes l é solo ra soasa de un mondo senpre pi stravià.
No n é pi i refuje che me piajea, agnoche i te dajea cuatro piate in duto e i no vienia «catalogade» par chel che se magna e se bee, cemodo che suzede senpre de pi al dì de ancuoi. Saron anche a ra vecia, ma de dute chiste «ristoranti d’alta quota» no voron propio insaé.
Nesto Coleto
L’articolo è pubblicato nell’edizione cartacea dell’Amico del Popolo n. 3 del 15 gennaio 2026, in distribuzione questa settimana (su abbonamento, in edizione digitale e in edicola).
