Ascolta questo articolo in podcast su Spotify.
Gli altri articoli di “Ladino e dintorni”
Un caro saluto e un pensiero di riconoscenza al dialettologo professor Enzo Croatto, ultranovantenne amico della Ladinia Bellunese, che di recente ho avuto occasione di rivedere e risentire.
Ai ultime de noenbre, grazie al amigo Marco da Peei e a ra «tecnolojia», ei abù acaro de vede e sentì dapò anes el professor Enzo Croatto, dialetologo conosciù inze ra nostra vales parceche del ‘86 l à dià a bete aduna l «Vocabolario Ampezzano» de ra Regoles e del 2004 l à fenì e stanpà el «Vocabolario del dialetto ladino-veneto della Valle di Zoldo (Belluno)», fruto de trenta ane de laoro.
Croatto el stà da pi de sessanta ane a Padova ma, massima d istade, fin ‘sà tenpo, el vienia vorentiera su in Cadore, asàche l à un cuartier a Vilanoa de Borcia. S aon conosciù del ‘88 a un Congresso de via in Fascia agnoche ió, tosato de trenta ane, see stà aduna con el, Iji Malto de r UldA, Silvio Menego de ra Regoles e l professor Bepe Richebuono, un outro amigo che recordo con acaro.
Co l é stà betù su l Istituto Ladin de la Dolomites fora a Borcia, el professor Croatto l é stà un de chi che i m à dà na gran man a ‘sì inaante; el scriea articole e librete, ma soralduto l à donà un grun de libre de ra sò racolta a ra Biblioteca del Istituto, che ai 8 de setenbre del 2007 ra i é stada dedicada a el.
Ben, ai 28 de noenbre me rua na «videochiamata» dal insenier Marco Moretta, un dei ultime restade a i tende drio al vocabolario noo del Oltreciusa, che spero dassen de vede, ignante de deentà massa vece. Marco l aea stà a ciatà Croatto, che ei vedù pitosc polito, anche se l disc che ra janbes es stenta a l tienì su: ma l é del 1932, donca el va su par i nonantacuatro!
On ciacolà poco par no l stracà: iusto un saludo intrà de amighe, e son vienù a saé che el professor el no stà mai fermo: l à lascià via par nafré i sò studie sul ladin, e ades l é duto ciapà a bete in ordin ra sò racolta de libre, partide fora in Biblioteca taliana, ladina, romancia e un grun de outre titole.
Ades che l 2026 l é beleche su ra porta, ciapo r ocajion par un saludo e l augurio de tienì duro par un bel toco!
Nesto Coleto
