Ascolta questo articolo in podcast su Spotify.
Gli altri articoli di “Ladino e dintorni”
Sta prendendo corpo, e sarà ultimata per Natale, «Vosto che tin conte una?», una nuova «fatica» editoriale che torna sulla cultura, parlata e toponomastica ampezzana.
Sié ane dapò de «Zibaldone Ampezzano», stanpà del 2019 da ra Sozietà par esse dà fora ai sozie, ei deziso de bete fora ra seconda parte de chel libro, che aee inze casseta da un toco. Chesto laoro, che spero che l rue par Nadà, l à gnon «Vosto che tin conte una (Zibaldone Ampezzano – Parte II) Espressioni ed interiezioni, nomignoli e oronimi, toponimi e voci ampezzane antiche e moderne, analizzate e commentate».
Conpain de chel d ignante, anche inze chesto (144 pajines betudes aduna da ra Stanparia Print House a Pian da Lago) l é inze dite, gnomes de luoghe, parola veces, storieles e «fijicaries» del anpezan che, se es no n é beleche sparides, pian pian deboto negun saarà pi.
A scomenzà da «aeo ra boleta?», ra domanda de un cassier de banca che l s intendea «boleta de ra steores», zenza pensà che par anpezan «boleta» l é anche ra tacia che deraotes se lascia su su ra mudandes; fin a «ra Zieta», el gnon che i vece i aea dà al Bèco de Mesodì e ancora no son stà bon de capì da agnoche l soute fora e se l ebe a ce fei co ra «Zuita», ra croda intrà Zoldo e l Agordin.
L é un gran viaso, abelì con un grun de fotografia veces e noes, che es se ciama con alcuanta paroles e gnomes; un libro che ei vorù fei parceche dute ci che i à acaro i no se desmentee de chel che in Anpezo l é stà. Tropa paroles es é leades a ra nostra crodes: ormai se sà che l é chel che vardo drio pi vorentiera; ma no n é solo chel, l é un viaso – serio e anche da ride – inze ra storia e ra parlada anpezana. Par el fei son stà dià da nossicuanta ‘sente, de ades e de na ota, che, despes zenza s inacorse, ra m à dà l còndar par pensà sora a calche pestuzo de cultura del mè paes.
No voi me pande pi de coscita co sto laoro, asàche i vece i dijarae «Lòudete zesto, che t as na bela mantia!». Aarei gran acaro se l libro l vienarà tolesc e lieto da ci che sente che el paes l é drio a esse redosà senpre de pi e ris-cion de perde l sò cuore.
Nesto Coleto
