Ascolta questo articolo in podcast su Spotify.
Gli altri articoli di “Ladino e dintorni”
Quest’estate Massimo Da Pozzo, guida alpina di Cortina, con il cliente Giordano Riello, è riuscito a trovare ancora un po’ di spazio vergine sulla super frequentata Torre Grande delle Cinque Torri.
Su pa ra Dolomites de Anpezo, zapegades ormai da anes anorum (sun calche ponta i ea beleche ruade a ra fin del ‘700), r é senpre pi dura ciatà fora un camin, un paré, un spigo agnoche no see ancora passà su negun. Par ci che vó lascià el sò gnon inze ra storia, ra ocajios es é senpre pi rares: epura…
St istade doi ome i é ‘sude adora a ciatà fora un toco agnó passà su par prime, sun un dei spizoi pi conosciude de ra val: ra Tore Granda de Naerou, darsonta ormai del 1880. Ai 24 d agosto Massimo Da Pozzo, guida anpezana con cuaranta e passa ane de pratega, e Giordano Riello, i é ruade su su ra ponta Ovest de ra Granda dal paré che l varda l refujo Scoiattoli, da agnoche se l tocia inze gnanche diesc menute.
Ra sò via, bateada «Cerullova» (ce voraralo dì?), ra và su a man zanca de ra «Via delle Guide», daerta da Dallamano e Ghirardini del 1930 e che dute ci che i scomenzà a scarpedà su pa ra Tores i aarae da fei. «Cerullova», che ra tocia anche ra vecia «Olga» de Rico Melero, Olga e Rinaldo Foloin, r é longa 125 metre, ra và su pitosc sul fazile, e parceche de outre i pode ra fei in segureza, Massimo l à lascià su 19 spit, na bela fré de azal.
Ci che ‘siarà drio ra zapores de Da Pozzo e Riello, i no pó de zerto pensà de esse sole, che negun i vede fin che i armasea su par el paré e che là, in stajon, no see bordèl; ma istesso, el sito l é un dei pi biei de Anpezo, na ota fenì e tornade ‘sò, se pó se conzede na bona bira scentade daante l refujo, e… anche chesto l é ‘sì in croda al dì de ancuoi.
Brao al «Mox», che el s à inventà un outra via sun una de ra crodes agnoche é de seguro de pi, agnoche ra dolomia r é bona e l é senpre bel tornà. De ra «Via delle Guide» che và su pede ra «Cerullova», ci che scrie l à un recordo: un dì de febraro de ‘sà cuaranta ane, propio lassù l à ciatà el scritor Mauro Corona, che incraota el parlaa poco, el no scriea e negun el conoscea.
Nesto Coleto
