Ascolta questo articolo in podcast su Spotify.
Scrivi «ladino» dentro “Trova in questo show” per ascoltare tutti gli altri podcast nelle parlate bellunesi.
Dal funestron de stua del cuartier agnoche stajon ormai da anes, dute i dis – tanto pi ades d istade, che despes el soroio el i peta propio su par sora – on daante i oce un spizon che sponta fora da ra cresta che ra core ‘sò da ra Rocheta pi pizora ves Dogana, e fin del 1918 ra marcaa el confin.
L é l «Zigar de ra Rocheta», bateà coscita ‘sà anes anorum da calchedun che, a l vardà su da Cortina, l aea fato cajo che el i recordaa l formei ciamà zigar, che l é fato a spizon suposò conpain. Ra ponta ra rua a 2154 metre: ‘sà dojento e passa ane, r Austria r aea loudà de tirà là el confin intrà Anpezo (donca el Tirolo) e San Vido (donca ra Republica Serenissima), e inze un landro ‘sodalpè del 1779 l é stà jaà fora el seign del confin numero 1, marcà danoo del 1852 e ancora del 1964, canche Minato del Bianco l à fato el ‘siro de dute i termin intrà Anpezo e i sete paese che on dintorno.
Inze alcuante libre se liese, e calche ota souta fora inze l parlà, sto «Zigar». A l smirà su da pede o con un canocial, el somea deboto pi na sciabela ca un toco de formei, e me sa che gran poche i see ruade fin su sote o i see ‘sude adora a darsonse ra ponta, che ra souta su pede ra Rocheta.
‘Sà calche an aee scomenzà a m inderetà de storia del mè paes: con un caro amigo aon stà su par chi grebane a vede del confin numero 1, e l aon ciatà.
Doi ane dapò, chel por Luciano el m aea menà su pa ra prima ota su ra Rocheta. Ignante de ra ponta, m aee inventà de ‘sì su anche sun un spizon alolo là sote, che pensae che fosse l Zigar, anche se aon scaazà via tropo pi in su del confin vedù doi ane ignante.
L é passà tanto tenpo e no m ei pi indurà a ‘sì a sgarboià intor el Zigar; ades me contento de l vardà fora da ra lastres de stua, e i on beleche fato nossicuanta fotografies. L é un pestuzo de ra nostra storia da no bicià via. Lassù, beleche ‘sà doi secui e meso, l ea ruà su par prime cissà cai ufiziai in mondura, mandade ca da Maria Teresa d Austria; ma dapò de lore, fin là sin à vedù gran poche de outre.
Nesto Coleto
