Ascolta l’articolo in podcast su Spotify.
Il pusterese Josef Maier, praticamente sconosciuto a Cortina, fu un rinomato commerciante di gioielli e pietre preziose, che aprì un negozio in centro e nel 1889 fece stampare una delle prime guide turistiche della valle ampezzana.
Ci eelo Josef Maier, e ce aeelo fato pa ra storia de Anpezo?
El m à contà algo l amigo Wolfgang, professor da Dobiaco che l và a vede de tropa stories de ra Dolomites, e inze a Viena l à ciatà fora algo de intressante. Nasciù a Sankt Lorenzen pede Bruneck del 1852 e morto del 1920, Josef Maier l ea un che el vendea ‘soies; l aea doa boteghes a Bolsan, una a Meran e una a Dobiaco, e ves ra fin del Otozento el in aea daerto ancora una in Anpezo, inze piaza visavì l ufizio de ra Posta.
Maier el vendea ‘soies, colagnes e fasces de filagrana de oro e de arsento con inze ametista, topazio e outre sasc «ciatade su pa ra crodes», che podea esse biei donatie par recordà ra val de Anpezo a ci che i cronpaa o el i ciapaa. L aea anche scultures de len e d avorio, cartes da letra, bastoi e bagolines par caminà; tanta roba de lusso, che fosc i anpezane i no ‘sia gnanche adora a cronpà, anche se inze l reclam el dijea che i sò prezie i ea basc e i laore de filagrana (de ra Scora Industriale) el i vendea al diesc parzento de manco.
A ra fin dei conte l é conosciù anche par aé fato fei un libreto, «Führer durch das Ampezzothal», na guida de ra val che – gouja che r ea del 1889 – r aarae da esse ra seconda stanpada par conosce ra val de Anpezo. El professor Strobl el crede che Maier el r aesse fata par i ra dà fora a ci che cronpaa algo da el: el libreto l à suposò vinte pajines, zenza gnanche na fotografia, e ca in Anpezo no l ei mai vedù né sentù a menzonà, donca se l caparà sarae na gran roba.
Se podarae dì che Maier see stà un gran pionier de chera «industria dei forestieri» che inze i ultime anes del Otozento ra i aea dà na gran prenta a ra nostra val, che ra s à fato conosce inze duto l mondo. Se se ‘sisse adora, mangare vardarei de ciatà fora algo de pi de chera botega, agnoche de seguro se podea se lustrà i oce a vede tanta roba de lusso!
Nesto Coleto
Cortina d’Ampezzo
